Mwanza – Makada wa Chama Cha Mapinduzi (CCM) katika Kata ya Nyegezi, Mwanza, wamewasilisha ombi kwa mamlaka husika, wakitaka wapigadebe waondolewe katika Stendi Kuu ya Mabasi Nyegezi kutokana na ongezeko la vitendo vya uhalifu, ikiwa ni pamoja na wizi.
Ombi hilo limekuja katika kikao kilichofanyika leo, Januari 13, 2025, ambapo viongozi wa CCM walijadili masuala ya ulinzi na usalama katika eneo hilo. Mwenyekiti wa CCM Mtaa wa California, Fadhili Nassoro, alieleza kuwa wapigadebe wanahusishwa na vitendo vya unyanyasaji wa abiria, hali ambayo imekuwa kero kwa wakazi na watumiaji wa stendi hiyo, hasa nyakati za usiku.
"Vitendo vya uhalifu vimeongezeka kwa kiasi kikubwa, na wengi wa wahalifu ni vijana wanaofanya kazi kama wapigadebe. Tunaomba mamlaka zichukue hatua na kuwahudumia na kuwatoa eneo hili," alisema Fadhili.
Mjumbe wa kikao hicho, Phidelis Kaombwe, aliongeza kuwa vituo vya kupakia na kushushia abiria vinakabiliwa na tatizo la kutumiwa kama maeneo ya siri na wapigadebe hao. Alisisitiza kuwa serikali inapaswa kutunga utaratibu rasmi wa kujenga utambulisho wa wapigadebe wanaofanya kazi kwa ufanisi.
"Serikali haitambui kazi ya wapiga debe, na tunahitaji kuwa na mfumo rasmi wa utambuzi ili kudhibiti wale wanaojihusisha na uhalifu," Kaombwe alibainisha.
Hata hivyo, wapigadebe kutoka stendi hiyo, kama ilivyo kwa Majaliwa Abdallah, wamesema wanajihusisha na kazi hiyo kwa nia ya kujipatia kipato cha halali na kuomba serikali iwe na mpango wa kutambua mchango wao.
Kwa upande mwingine, Mkurugenzi wa Halmashauri ya Jiji la Mwanza, Kiomoni Kibamba, alieleza kuwa ofisi yake inasubiri mapendekezo rasmi kutoka kwa CCM ili kutafuta suluhisho litakalowafaidisha wote bila kudhuru watu wahusika.
"Ni jambo jipya kwangu, nitategemea kupokea barua ya maelezo na mapendekezo yao, kisha tutapanga kikao maalum ili kujadili suala hili," Kibamba aliongeza.
Siku chache zilizopita, Kamanda wa Polisi Mkoa wa Mwanza, Wilbrod Mutafungwa, alikiri hali ya usalama mkoani humo kuwa ni shwari, akiahidi hatua madhubuti kwa wale wote watakaovunjia sheria.
