Kagera, Tanzania
Naibu Waziri Mkuu na Waziri wa Nishati, Dk. Dotto Biteko, amewataka wananchi wa Mkoa wa Kagera na diaspora kukumbuka nyumbani na kuja kuwekeza ili kuchochea ukuaji wa uchumi katika eneo hilo.
Wito huo ulitangazwa leo kwenye tamasha la Ijuka Omuka, linalofanyika mkoani Kagera, ambalo linahimiza wananchi kurejea nyumbani na kuwekeza katika sekta mbalimbali.
Dk. Biteko alisisitiza kwamba Mkoa wa Kagera, ambao unapakana na nchi za Afrika ya Mashariki, una fursa nyingi za kibiashara.
“Tamasha hili la Ijuka Omuka linabeba wazo la kihaya la ‘kumbuka nyumbani’, lililoandaliwa na ofisi ya mkuu wa mkoa ili kulirejesha Kagera katika nafasi yake ya maendeleo,” alisema Dk. Biteko.
Kwa upande wake, Waziri wa Mambo ya Ndani ya Nchi, Innocent Bashungwa, alisisitiza umuhimu wa ushirikiano na Mkuu wa Mkoa wa Kagera katika kutekeleza maendeleo.
Mkuu wa Mkoa wa Kagera, Hajjat Fatma Mwassa, aliongeza kwamba tamasha hili limeleta mafanikio makubwa, ikiwa ni pamoja na kuanzishwa kwa viwanda vipya, hivyo kutoa matumaini kwa maendeleo ya vijana katika mkoa huo.
