Naibu Waziri Mkuu na Waziri wa Nishati, Dk. Doto Biteko, amekutana na Jumuiya ya Kampuni zinazohusika na Usambazaji wa Mitungi ya Gesi (LPG) nchini, ikiwa na lengo la kuwashukuru kwa mchango wao katika utekelezaji wa Mkakati wa Nishati Safi ya Kupikia. Mazungumzo hayo yamefanyika leo Februari 20, 2025, jijini Dodoma, na kuhudhuriwa na Katibu Mkuu wa Wizara ya Nishati, Mhandisi Felchesmi Mramba, pamoja na wawakilishi kutoka Mamlaka ya Udhibiti wa Huduma za Nishati na Maji (EWURA) na Wakala wa Nishati Vijijini (REA).
Dk. Biteko amesema, “Ili serikali ifanikiwe, ni muhimu kuwashirikisha wananchi. Tunawashukuru sana kwa mchango wenu katika kufanikisha Mkakati wa Nishati Safi ya Kupikia uliozinduliwa mwaka 2024, ambapo uelewa na matumizi ya mitungi ya gesi yanaongezeka, jambo ambalo ni muhimu katika kujenga mazingira bora ya kupikia.”
Amesema kampuni hizo zinapaswa kuhakikisha mitungi ya gesi inapatikana kwa wingi hadi ngazi za vijiji, ili kufikia lengo la asilimia 75 ya wananchi watumiaji wa nishati safi ya kupikia ifikapo mwaka 2030, kama sehemu ya utekelezaji wa Mpango wa Mahsusi wa Nishati uliofanywa Januari 2025.
Dk. Biteko pia amesisitiza umuhimu wa kujadili changamoto zinazokabili biashara hiyo, hususan za kikodi, ambazo zitajadiliwa katika Muswada wa Masuala ya Fedha katika Bunge la Bajeti la mwaka 2025/2026. “Tumekutana hapa ili kuelewa ni mambo gani ya kuboreshwa katika Muswada wa Masuala ya Fedha ili kurahisisha upatikanaji wa huduma kwa wananchi,” amesema.
Amesema tangu uzinduzi wa Mkakati wa Matumizi ya Nishati Safi ya Kupikia, ushirikiano mkubwa umepatikana kutoka kwa nchi nyingi Afrika na duniani, na kuongeza kuwa, “Hii inaonyesha dhamira yetu ya kuhamasisha watu kuhamia kwenye matumizi ya nishati safi.”
Kwa mujibu wa Dk. Biteko, mwaka 2021, idadi ya watumiaji wa Nishati Safi ya Kupikia ilikua asilimia 9, lakini hadi Februari 2025 imefikia asilimia 33, ikiwa ni hatua muhimu kuelekea lengo la asilimia 80 ifikapo mwaka 2034.
Ameonyesha changamoto zinazokabili Serikali katika kuhamasisha matumizi ya Nishati Safi ya Kupikia, akipendekeza kuongeza elimu kwa wananchi ili kubadilisha mitazamo yao kuhusu matumizi ya nishati hiyo. Pia, aliahidi kuchukua hatua dhidi ya ombi la unafuu wa kodi kuhusu bidhaa za gesi.
Katibu Mkuu wa Wizara ya Nishati, Mhandisi Felchesmi Mramba, amesema Serikali inaendelea na mikakati ya kuhifadhi mafuta, ikiwa na lengo la kuimarisha hifadhi maalum za mitungi ya gesi.
Mwenyekiti wa Jumuiya ya Kampuni zinazohusika na Usambazaji wa Mitungi ya Gesi (LPG), Hamisi Ramadhani, amemshukuru Dk. Biteko kwa kikao hicho na kusema kuwa kampuni hizo zinapata ushirikiano mzuri kutoka Serikali kupitia EWURA na REA.
Ramadhani pia alisisitiza umuhimu wa kuimarisha ufikiaji wa mitungi ya gesi mijini na vijijini, akitoa ahadi ya kuendelea kushirikiana na Serikali katika kuhakikisha Tanzania inakuwa kitovu cha usambazaji wa LPG katika Ukanda wa Afrika Mashariki.
