Dodoma, Tanzania – Wananchi wamehimizwa kuendelea kulipa kodi kwa hiari ili kusaidia serikali katika kutekeleza miradi mbalimbali ya maendeleo, ikiwemo sekta za maji, afya, elimu, na huduma nyingine za jamii.
Wito huu umetolewa leo, Februari 14, 2025, na Kaimu Mkuu wa Wilaya ya Dodoma, Francis Kaunda, wakati wa maadhimisho ya Siku ya Shukrani kwa Walipa Kodi, yaliyofanyika katika mji wa Dodoma na kuandaliwa na Mamlaka ya Mapato Tanzania (TRA).
Maadhimisho hayo yalihusisha matembezi ya hiari kutoka ofisi za TRA kupitia mitaa mbalimbali hadi Uwanja wa Jamhuri, yakimalizika na hafla fupi iliyoshirikisha wateja wa mamlaka.
Kaunda alisisitiza umuhimu wa ulipaji wa kodi, akihimiza TRA kuongeza juhudi za kutoa elimu ili kuhamasisha wananchi zaidi kulipa kodi kwa hiari. “Umuhimu wa kulipa kodi unapaswa kueleweka na kila mwananchi, kwani serikali yetu itaweza kutekeleza miradi mikubwa tu endapo tunatekeleza wajibu wetu,” alisema.
Meneja wa TRA Mkoa wa Dodoma, Pendolake Elinisafi, aliongeza kuwa mamlaka hiyo inaendelea kuboresha huduma kwa wateja huku ikifanya ulipaji wa kodi kuwa rahisi na wa hiari. “Siku hii inatuwezesha kujadili changamoto zinazowakabili walipa kodi na kutafuta ufumbuzi. Tunatarajia kuwa elimu ya kodi itaendelea kutolewa kwa wigo mpana zaidi,” Elinisafi alisema.
Maadhimisho hayo ni juhudi za kuhamasisha wananchi kuhusu umuhimu wa kulipa kodi kwa maendeleo ya taifa.
