Wabunge wa Kamati ya Kudumu ya Bunge ya Ardhi, Maliasili na Utalii wamepongeza juhudi za serikali ya awamu ya sita chini ya Rais wa Jamhuri ya Muungano wa Tanzania, Dkt. Samia Suluhu Hassan, kwa kutenga shilingi 10,474,526,694.25 kwa ajili ya ujenzi wa jengo la utawala la Mamlaka ya Hifadhi ya Ngorongoro, pamoja na nyumba tatu za kuishi viongozi wa mamlaka hiyo.
Katika ziara yao ya kukagua ujenzi wa makao makuu mapya ya mamlaka hiyo yanayoendelea katika mji wa Karatu, Mkoani Arusha, wabunge wengi wamesema uamuzi wa serikali wa kuendelea kutekeleza mradi huu ni muhimu kwa kuboresha mazingira ya kazi kwa wahudumu wa mamlaka hiyo.
Mwenyekiti wa kamati hiyo, amesema ni muhimu wizara ya Maliasili na Utalii kuhakikisha miundombinu hiyo, pamoja na miradi mingine inayosimamiwa na wizara hiyo, inakamilishwa kwa wakati na inaanza kutoa huduma kwa jamii.
Wabunge hao pia wameitaka wizara kuhakikisha ujenzi wa miundombinu unakamilishwa kwa wakati na kuwa na ubora wa hali ya juu ili kutimiza matarajio yaliyowekwa.
Waziri wa Maliasili na Utalii ametoa shukrani kwa wabunge hao kwa ushujaa wao katika kuisimamia wizara, akiahidi kuwa maelekezo yote ya kamati yatafanyiwa kazi, ikiwa ni pamoja na usimamizi wa ujenzi wa mradi huo kwa hatua mbalimbali.
Kwa sasa, mradi wa ujenzi wa jengo la utawala, nyumba ya Kamishna wa Uhifadhi, na nyumba za manaibu Kamishna umefikia asilimia 85 ya ujenzi na unatarajiwa kukamilika mwishoni mwa mwezi Mei mwaka huu.
