Moshi. Mkoa wa Kilimanjaro unajulikana zaidi kwa Mlima Kilimanjaro, mrefu zaidi barani Afrika, lakini unatoa vivutio vingi zaidi kwa wageni. Mkoa huu una mandhari ya kuvutia, watu wenye ukarimu na utajiri wa utamaduni wa kipekee, ukijumuisha makabila kadhaa, likiwemo kabila maarufu la Wachaga.
Kila mwaka, Mkoa wa Kilimanjaro unashuhudia ongezeko kubwa la watu ambao hurudi nyumbani kwa ajili ya kuungana na familia na kusherehekea sikukuu za mwisho wa mwaka. Utamaduni huu umewafanya Wachaga kuonekana pekee, na umekuwa chimbuko la umaarufu wa mkoa katika kipindi hiki cha Desemba, ambapo watu wengi kutoka ndani na nje ya nchi huja nyumbani.
Katika kipindi hiki, kumbi za starehe, baa na maeneo mengine ya biashara hushuhudia ongezeko la mauzo, kama watu wanasherehekea kwa kutumia mali zao. Katika vijiji, shughuli kama kuchinja mbuzi na kunywa pombe maarufu ya kienyeji ya mbege hupamba moto. Hii ni sehemu ya utamaduni wa kuwakaribisha wageni na kusherehekea pamoja.
Mzee Tadeus Mushi (72) kutoka Kibosho anasimulia kuhusu mikutano hii ya familia na umuhimu wake. Anasema kuwa kipindi hiki ndiyo wakati ambapo ndugu jamaa hukutana, wakifanya mipango ya mwaka ujao pamoja na kukumbushana historia na tamaduni za familia zao.
“Ni wakati wa kula, kunywa, na kufurahi na familia pamoja na kupanga mipango ya maendeleo,” anasema Mushi, akiongeza kuwa baada ya sikukuu, watu huwa wanarejea kwenye shughuli zao. Mbali na furaha, wanakutana na wazee ili kuwaombea baraka kwa ajili ya mwaka mpya.
Mzee Mushi anasema kuwa nyakati hizi, mbuzi wengi huchinjwa na familia hutenga maeneo maalumu kwa ajili ya sherehe. Utamaduni huu unawakumbusha wanafamilia umuhimu wa kukutana na wazee, kwani wengi wanaamini kwamba kukosa kukutana na wazee kunaweza kuathiri mafanikio ya mtu.
Hata hivyo, Mushi anahofia kwamba utamaduni huu unakabiliwa na changamoto kutokana na vijana wengi ambao wameanza kupuuza mila hizo na kukumbatia mabadiliko ya kisasa.
“Sio vijana pekee wanaorudi, bali hata makabila mengine yanaanza kufuata mfano huu wa kukutana ili kuimarisha umoja,” anasema Sophia Makoi, akisisitiza umuhimu wa kipindi hiki cha sikukuu katika kuimarisha familia.
James Joseph kutoka Dar es Salaam anasema, “Kipindi hiki ni muhimu kwa kila familia kupanga mipango ya maendeleo na kuungana upya.”
Mchungaji Glorious Shoo na wenyeji wengine wa Machame wanakubali kuwa utamaduni wa kukutana ni muhimu na unastahili kuigwa na jamii zote, ingawa wanakabiliwa na changamoto kama kupanda kwa gharama za usafiri na vyakula.
Mkoa wa Kilimanjaro, kwa hivyo, unaendelea kuimarisha utamaduni huu wa kipekee ambao unaleta umoja na mshikamano katika jamii.
