Rais Dk. Samia Suluhu Hassan anatarajiwa kuwa mgeni rasmi katika maadhimisho ya miaka 25 ya Chama cha Majaji Wanawake Tanzania (TAWJA) yatakayofanyika kuanzia Januari 19 hadi 23, 2025, katika Ukumbi wa Mikutano wa Kimataifa jijini Arusha.
Mwenyekiti wa TAWJA, Jaji wa Rufani Barke Sehel, alithibitisha leo Desemba 19, 2024, kuwa maadhimisho hayo yatatoa fursa muhimu ya kujadili masuala ya haki na usawa wa kijinsia.
“Tutazingatia changamoto zinazotokana na ongezeko la kesi za ubakaji na ulawiti, na hatua zinazohitajika kukabiliana nazo,” alisema Jaji Sehel.
Jaji mstaafu Sophia Wambura, mwenyekiti wa kamati ya maandalizi, alisisitiza kuwa TAWJA imepata mafanikio makubwa katika kipindi hiki, ikiwa ni pamoja na kuimarisha usawa wa kijinsia katika Mahakama na jamii.
Aidha, Jaji wa Mahakama Kuu Kanda ya Arusha, Aisha Bade, aliongeza kuwa elimu kuhusu dhamana itatolewa ili kushughulikia changamoto zinazokwamisha utekelezaji wake.
Maadhimisho hayo yatakutanisha wadau mbalimbali, wakilenga kuboresha hali ya haki za wanawake na kuimarisha usawa katika jamii.
