Mwanza. Ufugaji wa samaki kwa njia ya vizimba ndani ya Ziwa Victoria unakabiliwa na changamoto kubwa baada ya kuenea kwa kasi magugu ya gugu maji, jamii ya Salvinia SPP.
Gugu maji hili limeripotiwa kuzaliana mara mbili hadi tatu kila baada ya siku nane, na hali hii inatishia ustawi wa ufugaji wa samaki ulioanzishwa na Rais Samia Suluhu Hassan.
Katika ziara ya kutembelea eneo la Kigongo-Busisi, miongoni mwa maeneo yaliyoathiriwa, Katibu Mkuu Ofisi ya Makamu wa Rais Muungano na Mazingira, Cyprian John Luhemeja, alisema kuwa kasi ya kuenea kwa gugu maji hili inatoa taarifa mbaya kwa juhudi za ufugaji wa samaki.
"Kama gugu maji haya yanazaliana mara mbili hadi tatu baada ya siku nane, ni wazi kwamba juhudi za Rais Samia za kuzindua ufugaji wa vizimba zipo kwenye hatari," aliongeza Luhemeja.
Alibaini kuwa uchafu mwingi unaoingia ziwani ni miongoni mwa sababu za kuenea kwa gugu maji hili, na akaagiza halmashauri zinazozunguka ziwa kuanzisha kampeni maalumu za usafi, ikiwa ni pamoja na kuhifadhi taka kwenye madampo na kufanya urejelezaji au uchomaji.
“Hatufanyi usafi wa kutosha. Hali hii inasababisha mvua zinaponyesha kuhamasisha uchafu kuingia ziwani, na matokeo yake ni kwamba fukwe zetu zinageuka dampo, hali inayoshuhudiwa kwa karibu na Ziwa Victoria na pwani ya Bahari ya Hindi," alisema.
Luhemeja aliongeza kuwa gugu maji limeathiri shughuli za uvuvi na usafirishaji kwa vivuko, na Mkuu wa Mkoa wa Mwanza, Said Mtanda, alisema wasafiri zaidi ya 10,000 wanakumbana na matatizo ya usafiri kila siku kutokana na majani hayo.
"Malalamiko makubwa yanahusu vivuko. Watu wanakaa masaa mrefu wakisubiri kuvuka, hali ambayo inahitaji hatua haraka," aliongeza Mtanda.
Aliweka wazi kuwa hata kama gugu hili likitolewa tani 10 kila siku, linaweza kuzaa tani 30 nyingine, hivyo kuathiri uwekezaji wa samaki ndani ya ziwa.
Miongoni mwa wakazi wa Kigongo, Yusuph Ndaki alielezea jinsi magugu haya yalivyowafanya wavuvi kuhama eneo hilo, na Msimamizi wa Mitumbwi, David Vitalis, aliongeza kuwa upatikanaji wa samaki umekuwa changamoto kutokana na gugu maji.
Wakazi wa Mwanza walieleza hofu yao kutokana na usumbufu na gharama za usafiri zinazotokana na gugu maji.
Baada ya kutembelea eneo hilo, viongozi wa Serikali na wadau wa mazingira wamejiweka pamoja kujadili mikakati ya kukabiliana na tatizo hili.
