Dodoma. Waziri wa Nchi, Ofisi ya Makamu wa Rais, Muungano na Mazingira, Hamad Masauni ameelezea changamoto nne kubwa zinazoikabili Tanzania katika kutanua wigo wa uchumi wa buluu, huku akisisitiza kukosekana kwa ujuzi unaohitajika katika matumizi ya rasilimali hizi kama sababu mojawapo.
Changamoto nyingine ni ukosefu wa mpango wa matumizi ya maeneo ya maji, uwekezaji usio na mkakati mzuri, na pia upungufu wa utafiti na maarifa kuhusu matumizi ya uchumi wa buluu. Aidha, Masauni aliongeza kuwa kuna ukosefu wa mfumo jumuishi wa uratibu wa shughuli hizi katika ngazi ya kitaasisi.
Masauni alifanya mazungumzo haya katika mkutano ulioangazia mpango kazi wa uchumi wa buluu kwa mwaka 2024/25 na 2025/26. Mkutano huu ulitanguliwa na kikao cha makatibu wakuu wa sekta zinazohusiana na uchumi wa buluu, ambapo walitoa maoni na miongozo muhimu kwa ajili ya kuboresha mpango kazi kufikia lengo lililokusudiwa.
Katika mkutano huo, Masauni alieleza kuwa uchumi wa buluu unahusisha shughuli endelevu zinazohusiana na maeneo ya maji kama baharini, kwenye maziwa, mito, na maeneo oevu, akisisitiza umuhimu wa rasilimali hizi kwa maendeleo ya kijamii na kiuchumi bila kuathiri mazingira.
Masauni alisisitiza umuhimu wa rasilimali zikiwemo kilomita 1,424 za ufukwe wa pwani, kilomita 700 za misitu ya mwambao, na takriban trilioni 47.13 za gesi asilia, akibainisha kuwa rasilimali hizi zinachangia pakubwa katika ukuaji wa uchumi, ikiwa na bandari 972 zinazotengeneza fursa ya usafirishaji na biashara.
Shughuli za uchumi wa buluu nchini zinaelekezwa na sera na mikakati mbalimbali ikiwemo uvuvi, nishati, uchukuzi, na utalii, na hivyo kusaidia katika kuimarisha matumizi endelevu ya rasilimali.
“Mkakati huu wa utekelezaji unatoa mwelekeo wa wazi wa jinsi Tanzania inavyoweza kunufaika na rasilimali za maji bahari na baridi,” alisema Masauni.
Kwa upande wa Waziri wa Mifugo na Uvuvi, Dk. Ashatu Kijaji, alisisitiza kuwa lengo ni kuhakikisha rasilimali zinatumika kwa faida kubwa na alimpongeza Rais Samia Suluhu Hassan kwa uongozi wake katika kutekeleza juhudi hizi.
Kulingana na Taarifa ya Hali ya Uchumi ya mwaka 2023, sekta ya uvuvi inatarajiwa kukua kwa asilimia 34.9, huku uzalishaji wa mazao ya uvuvi ukitarajiwa kuongezeka kutoka tani 473,592 hadi tani 639,092 ifikapo mwaka 2024.
