Dar es Salaam. Kiongozi wa Kanisa la Kiinjili la Kilutheri Tanzania (KKKT), Dk Alex Malasusa, ametoa wito kwa Mamlaka ya Mapato Tanzania (TRA) kuongeza juhudi za ukusanyaji wa kodi kwa njia ya uaminifu, akisisitiza kwamba hii itawatia moyo walipa kodi kutimiza wajibu wao bila mashaka kuhusu matumizi ya fedha hizo.
Dk Malasusa aliyasema hayo katika mkutano na uongozi wa TRA, akionyesha umuhimu wa kuimarisha mahusiano mazuri kati ya mamlaka hiyo na taasisi mbalimbali. “Tukiendelea kuona maendeleo, tutatambua kuwa ni kutokana na kodi za Watanzania. Kanisa linataka kuona kasi ya maendeleo nchini, hivyo ni muhimu kuhakikisha kila mmoja anawajibika kwa kulipa kodi,” alisisitiza.
Ameongeza kuwa, ni muhimu kwa wananchi kuelewa umuhimu wa kulipa kodi, akieleza kwamba tatizo lipo katika idadi ndogo ya walipa kodi. “Kwa juhudi tunazoziona, kuna matumaini kwamba idadi ya walipa kodi itaongezeka, na makusanyo yatakua zaidi, hivyo makato yatakuwa sahihi na yasiyo na usumbufu,” alisema Dk Malasusa.
Aidha, alitoa mwito kwa waumini kuelewa athari za kutolipa kodi, akionya kuwa kutokuwa na ushiriki katika ulipaji kodi kunamaanisha kupunguza rasilimali za nchi. “Tutatoa elimu kuhusu umuhimu wa kulipa kodi. Maandiko yanatufundisha kuheshimu mamlaka, kwani ukusanyaji wa kodi ni muhimu katika maendeleo ya nchi,” aliongeza.
Kamishna wa TRA, Yusuph Mwenda, alieleza kuwa waumini wa KKKT ni sehemu ya walipa kodi na kuwa mamlaka hiyo iko tayari kushirikiana nao ili kukuza msukumo wa ulipaji kodi wa hiari. “TRA ni taasisi ya Watanzania, na tumepewa jukumu la kukusanya kodi kwa manufaa ya Watanzania wote. Tunataka kutoa elimu ya kodi ili walipa kodi wajue wajibu wao,” alisema Mwenda.
Ili kuboresha ukusanyaji wa kodi, Mwenda aliongeza kuwa mifumo rahisi imeanzishwa kuwezesha watu kulipa kodi mara wanapohitajika, popote walipo. “Ili kuwe na usawa katika ulipaji kodi, ni muhimu kila mtu alipe, ingawa kuna baadhi wanakwepa wajibu wao kwa kutoa risiti bandia,” alimbainisha Mwenda.
