Morogoro. Jeshi la Polisi Mkoa wa Morogoro limeongeza mikakati yake ya kukabiliana na vitendo vya kikatili dhidi ya watoto, likiwemo kukata vimeo, kung’oa meno, na kukata ngozi ya chini ya ulimi (udata). Kamishna Msaidizi Mwandamizi wa Polisi, Alex Mkama, amesisitiza kuwa vitendo hivi ni kinyume cha sheria na vinakiuka haki za watoto, na hatua kali zitachukuliwa dhidi ya wote watakaobainika kuhusika.
Mkama amewashauri wazazi na walezi kuwa makini, akiwataka kuepuka kuwapeleka watoto wao kwa waganga wa jadi wanajihusisha na vitendo vya ukatili. Hata hivyo, wazazi watakaobainika kushirikiana na waganga hao watachukuliwa hatua za kisheria.
Onyo hili linatolewa sambamba na uzinduzi wa kampeni ya kitaifa inayolenga kukomesha vitendo vya ukeketaji wa viungo vya kinywa kwa watoto. Mkama amesema kuwa Jeshi la Polisi lina jukumu la kulinda usalama wa raia pamoja na mali zao, na kwamba usalama wa afya za wananchi ni msingi wa kazi hiyo.
Katika kuzungumzia matibabu yasiyo ya kitaalamu yanayohatarisha afya za watoto, Mkama amerejelea kuwa vitendo kama vile kukata vimeo, kung’oa meno, na kukata ngozi ya ulimi ni kinyume na sheria, na vinavunja haki za watoto. Amesisitiza kwamba huduma za afya zinapatikana hospitalini, na kutoa matibabu yasiyo sahihi kunatishia maisha ya watoto.
Mkurugenzi Msaidizi wa Huduma za Kinywa na Meno kutoka Wizara ya Afya, Dk. Baraka Nzobo, ameongeza kuwa vitendo hivi vinatafsiriwa kama ukeketaji wa viungo vya kinywa, na amewataka wazazi kuendelea kutoa elimu kwa jamii ili kukomesha mila potofu zinazohusisha ukatili dhidi ya watoto.
Dk. Nzobo amehadharisha kuhusu madhara ya kiafya yanayoweza kutokea kutokana na vitendo hivi, ikiwemo kuvuja kwa damu na hatari ya kifo. Ameeleza kwamba kimeo ni kiungo kama viungo vingine vya mwili, na kumkataa mtoto kimeo si sahihi.
Mganga Mkuu wa Mkoa wa Morogoro, Dk. Besti Magoma, amezindua kampeni hiyo akisema itahusisha wadau mbalimbali, wakiwemo viongozi wa dini, walimu, na watumishi wa afya. Utafiti umeonyesha kuwa waganga wanaofanya vitendo hivi hawajasajiliwa kisheria, na kampeni itatoa elimu juu ya madhara ya vitendo vya ukatili kwa watoto.
Oswad Nyamoga ni mzazi ambaye aliwahi kumpeleka mtoto kwa waganga, akielezea madhara viongozi wa watoto hao baada ya kukatwa kimeo. Asha Hamis naye amekiri kumpeleka mjukuu wake kumng’oa meno baada ya kupokea ushauri, akijutia hatua hiyo baada ya kuona madhara.
Jeshi la Polisi Mkoa wa Morogoro na wadau wengine wamejizatiti kutokomeza vitendo hivi vya ukatili kwa watoto katika jamii.
